ഫോർമുല വൺ (F1) ട്രാക്കുകളിൽ വേഗതയുടെ പുതിയ ചരിത്രമെഴുതുന്ന യുവതാരം ആർവിഡ് ലിൻഡ്ബ്ലാഡ് (Arvid Lindblad) വീണ്ടും വാ വാർത്തകളിൽ നിറയുകയാണ്. റെസിംഗ് ബുൾസിന്റെ (Racing Bulls) 19-കാരനായ ഈ ബ്രിട്ടീഷ് ഡ്രൈവർ തനിക്ക് ഇന്ത്യയുമായുള്ള ആഴത്തിലുള്ള ബന്ധത്തെക്കുറിച്ചും സംസ്കാരത്തെക്കുറിച്ചും തുറന്നുപറഞ്ഞിരിക്കുന്നു. സ്വീഡിഷ് പിതാവിന്റെയും ബ്രിട്ടീഷ്-ഇന്ത്യൻ മാതാവിന്റെയും മകനായ ആർവിഡ്, എഫ്-1 ലോകത്ത് തന്റെ 'ഇന്ത്യൻ വേരുകൾ' ഉറക്കെ പ്രഖ്യാപിക്കുകയാണ്.
സിംഗപ്പൂർ ഗ്രാന്റ് പ്രിക്സിനിടെ നൽകിയ അഭിമുഖത്തിലാണ് താരം തന്റെ വ്യക്തിജീവിതത്തെക്കുറിച്ചും ഇന്ത്യയോടുള്ള സ്നേഹത്തെക്കുറിച്ചും സംസാരിച്ചത്.
ഇന്ത്യൻ സംസ്കാരവും ആചാരങ്ങളും തനിക്ക് പുത്തരിയല്ലെന്ന് ആർവിഡ് പറയുന്നു:
"വർഷങ്ങളായി എന്റെ ഉള്ളിലുള്ള ഒന്നാണിത്, ഇപ്പോഴാണ് ഇത് പൊതുസമൂഹത്തിന് മുന്നിൽ കൂടുതൽ വ്യക്തമാകുന്നത്. യുകെയിലെ വീട്ടിലുള്ളപ്പോൾ അമ്മയുടെ മാതാപിതാക്കൾക്കൊപ്പമാണ് (നാനിയും നാനയും) ഞാൻ കൂടുതൽ സമയവും ചെലവഴിക്കാറുള്ളത്. ഒരുമിച്ച് ക്രിക്കറ്റ് കാണുന്നതും ഇന്ത്യൻ ഭക്ഷണങ്ങൾ കഴിക്കുന്നതും ക്ഷേത്രങ്ങളിലും ഗുരുദ്വാരകളിലും പോകുന്നതുമെല്ലാം എന്റെ ജീവിതത്തിന്റെ ഭാഗമാണ്."
കഴിഞ്ഞ മാർച്ച് മാസത്തിൽ ഇന്ത്യയിൽ നടന്ന പ്രൊമോഷണൽ ഈവന്റിന് മുന്നോടിയായി, ആർവിഡിന്റെ നെറ്റിയിൽ അമ്മമ്മ (നാനി) തിലകം ചാർത്തുന്ന വീഡിയോ സോഷ്യൽ മീഡിയയിൽ ദശലക്ഷക്കണക്കിന് ആളുകളാണ് കണ്ടത്.
ഇന്ത്യൻ സന്ദർശന അനുഭവങ്ങളെക്കുറിച്ച് സംസാരിക്കവെ യൂറോപ്പും ഇന്ത്യയും തമ്മിലുള്ള രസകരമായ ഒരു താരതമ്യവും ആർവിഡ് പങ്കുവെച്ചു:
"യൂറോപ്പിൽ ആളുകൾക്കിടയിൽ മറ്റുള്ളവരോട് അസൂയപ്പെടാനുള്ള പ്രവണത കൂടുതലാണ്. 'മറ്റുള്ളവർക്ക് എന്തൊക്കെയുണ്ട്, തനിക്കെന്താണ് ഇല്ലാത്തത്' എന്ന് ചിന്തിച്ചാണ് പലരും നിരാശരാകുന്നത്. എന്നാൽ ഇന്ത്യയിൽ അവസ്ഥ വേറെയാണ്. അവിടെ ദാരിദ്ര്യമുണ്ട്, എന്നാൽ ആളുകൾ സ്വന്തം ജീവിതത്തിൽ ശ്രദ്ധ കേന്ദ്രീകരിക്കാനാണ് ശ്രമിക്കുന്നത്. മറ്റുള്ളവരെ നോക്കി അസൂയപ്പെടുന്ന ശീലം അവിടെ വളരെ കുറവാണ്."
തന്റെ ആദ്യ എഫ്-1 സീസണിൽ തന്നെ മികച്ച പ്രകടനമാണ് ഈ പതിനാറുകാരൻ (13-ാം വയസ്സ് മുതൽ റെഡ് ബുൾ ജൂനിയർ പ്രോഗ്രാമിന്റെ ഭാഗമാണ്) കാഴ്ചവെക്കുന്നത്. അവസാനമായി മത്സരിച്ച 11 റേസുകളിൽ 10 എണ്ണത്തിലും പോയിന്റ് നേടാൻ ആർവിഡിനായി.
2013-ന് ശേഷം ഇന്ത്യയിൽ ഫോർമുല വൺ മത്സരങ്ങൾ നടന്നിട്ടില്ലെങ്കിലും, ഇവന്റ് വീണ്ടും രാജ്യത്തേക്ക് എത്തിക്കാനുള്ള നീക്കങ്ങൾ കേന്ദ്ര സർക്കാർ തലത്തിൽ നടക്കുന്നുണ്ട്. ബുദ്ധ് ഇന്റർനാഷണൽ സർക്യൂട്ടിൽ ഫോർമുല വൺ തിരിച്ചെത്തിയാൽ അത് തനിക്ക് വലിയൊരു അനുഭവമായിരിക്കുമെന്ന് ആർവിഡ് കൂട്ടിച്ചേർത്തു.
ഇന്ത്യയിൽ നിന്നൊരു ഡ്രൈവർ നിലവിൽ എഫ്-1 റഡാറിലില്ലാത്ത സാഹചര്യത്തിൽ, ആർവിഡ് ലിൻഡ്ബ്ലാഡിന് വലിയൊരു ആരാധകവൃന്ദമാണ് രാജ്യത്ത് രൂപപ്പെടുന്നത്!
